ໃນວັນທີ 08 ພຶດສະພາ 2025, ກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ໄດ້ຈັດກອງປະຊຸມ ສະໄໝສາມັນ ຄັ້ງທີ XXI ຂອງຄະນະກໍາມະການ ບໍລິຫານອຸທິຍານແຫ່ງຊາດ ນາກາຍ-ນໍ້າເທີນ ຂຶ້ນ, ທີ່ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ປອ. ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ທັງເປັນປະທານ ຄະນະກໍາມະການບໍລິຫານ ອຸທິຍານແຫ່ງຊາດ ນາກາຍ-ນໍ້າເທີນ, ຊຶ່ງມີທ່ານຮອງເຂົ້າແຂວງ ແຂວງບໍລິຄໍາໄຊ ແລະ ແຂວງຄໍາມ່ວນ; ທ່ານຫົວໜ້າກົມ, ຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານເຈົ້າເມືອງ (ຄະນະກໍາມະການບໍລິຫານ), ຂະແໜງການທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ທ່ານ ສີທັດ ພີມມະຈັນ ຫົວໜ້າກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ໄດ້ລາຍງານໃຫ້ຮູ້ວ່າ: ອຸທິຍາຍແຫ່ງຊາດ ນາກາຍ-ນໍ້າເທີນ ມີເນື້ອທີ່ທັງໝົດ 427.770 ເຮັກຕາ ກວມເອົາ 2 ແຂວງ ຄື: ແຂວງຄໍາມ່ວນ ແລະ ແຂວງບໍລິຄໍາໄຊ; ມີປ່າໄມ້ປົກຫຸ້ມ 86%, ປະກອບມີສັດປ່າ ທັງໝົດ 5 ຊະນິດພັນ ໃນນີ້: 92 ຊະນິດພັນລ້ຽງລູກດ້ວຍນໍ້ານົມ, 29 ຊະນິດພັນເລືອຄານ, 25 ຊະນິດພັນເຄິ່ງບົກເຄິ່ງນໍ້າ, 403 ຊະນິດພັນນົກ ແລະ 69 ຊະນິດພັນປາ; ປະຊາຊົນຍັງທຸກຍາກ ອີງໃສ່ການເຮັດກະສິກໍາແບບທໍາມະຊາດ, ລ່າສັດເພື່ອກິນ ແລະ ເກັບເຄື່ອງປ່າຂອງດົງ; ໄພຂົ່ມຂູ່ສ່ວນໃຫຍ່ ແມ່ນການຕັດໄມ້-ທໍາລາຍປ່າ, ລ່າສັດປ່າ-ສັດນໍ້າຜິດກົດໝາຍ, ເກັບເຄື່ອງປ່າຂອງດົງຜິດກົດໝາຍ, ການເຂົ້າປ່າສະຫງວນທີ່ຜິດລະບຽບກົດໝາຍ; ເປົ້າໝາຍໃນການຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ 2022-2026 (ຫຼຸດຜ່ອນໄພຂົມຂູ່ ໃຫ້ໄດ້ 40%, ຍົກສູງຊີວິດການເປັນຢູ່ໃຫ້ດີຂຶ້ນ ແລະ ຮັກສາປ່າປົກຫຸ້ມ ໃຫ້ໄດ້ 86%).

                ນອກຈາກນີ້, ໃນທີ່ປະຊຸມ ໄດ້ຍົກໃຫ້ເຫັນຜົນງານອັນພົ້ນເດັ່ນ; ບັນດາຂໍ້ຄົງຄ້າງ ແລະ ປະກົດການຫຍໍ້ທໍ້ຕ່າງໆ ທີ່ເປັນສາເຫດ ເຮັດໃຫ້ຊັບພະຍາກອນປ່າໄມ້ ແລະ ທີ່ດິນປ່າໄມ້ໃນເຂດດັ່ງກ່າວ ຖືກບຸກລຸກ, ຈັບຈ່ອງ ແລະ ທໍາລາຍຢ່າງຕໍ່ເນື່ອງ. ຫຼັງຈາກນັ້ນ, ຜູ້ແທນກອງປະຊຸມ ກໍ່ໄດ້ພ້ອມກັນສົນທະນາ, ປະກອບຄໍາເຫັນຢ່າງສ້າງສັນ ແລະ ກົງໄປກົງມາ ແນໃສ່ການແກ້ບັນຫາ ປະກົດການຫຍໍ້ທໍ້ທີ່ເກີດຂຶ້ນໃນສະພາບປັດຈຸບັນ ເພື່ອເປັນແນວທາງໃນການກໍານົດທິດທາງແຜນການ ແລະ ມາດຕາການແກ້ໄຂ ໃນຕໍ່ໜ້າ ໃຫ້ຖືກຕ້ອງກັບສະພາບຄວາມເປັນຈິງໃນທ້ອງຖິ່ນ ເພື່ອເຮັດໃຫ້ວຽກງານການຄຸ້ມຄອງ-ປົກປັກຮັກສາອຸທິຍານແຫ່ງຊາດ ນາກາຍ-ນໍ້າເທີນ ໃຫ້ມີປະສິດທິພາບ ແລະ ສາ ມາດຈັດຕັ້ງປະຕິບັດ ໃຫ້ມີປະສິດທິຜົນ.

ໃນຕອນທ້າຍຂອງກອງປະຊຸມ ທ່ານປະທານ ໄດ້ມີຄໍາເຫັນແລກປ່ຽນບາງຈຸດ ເພື່ອເປັນແນວທາງໃນການຈັດຕັ້ງປະຕິບັດ ຄືດັ່ງນີ້: 1. ໃຫ້ຈັດສັນງົບປະມານເຂົ້າໃສ່ວຽກປັບປຸງຊີວິດການເປັນຢູ່ຂອງປະຊາຊົນ ທີ່ອາໄສຢູ່ໃນ ແລະ ອ້ອມຮອບເຂດອຸທິຍານແຫ່ງຊາດເປັນສ່ວນໃຫຍ່; 2. ມອບໃຫ້ກົມປ່າໄມ້ ເປັນໃຈກາງ ສົມທົບກັບກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ແລະ ພາກສ່ວນກ່ຽວຂ້ອງ ທັງສູນກາງ ແລະ ທ້ອງຖິ່ນ ເພື່ອຜັນຂະຫຍາຍ ແລະ ຈັດຕັ້ງປະຕິບັດຄຳສັ່ງ ຂອງນາຍົກລັດຖະມົນຕີ ສະບັບເລກທີ 20/ນຍ, ລົງວັນທີ 05 ພະຈິກ 2024 ໃຫ້ປະກົດຜົນເປັນຈິງ, ປະສານສົມທົບກັບພາກສ່ວນກ່ຽວຂ້ອງ ເພື່ອກະກຽມສະເໜີອຸທິຍານແຫ່ງຊາດ ນາກາຍ-ນໍ້າເທີນ ເຂົ້າໃນບັນຊີລໍຖ້າ ພິຈາລະນາເປັນມໍລະດົກໂລກ; 3. ໃຫ້ກົມປ່າໄມ້ ແລະ ກອງຄຸ້ມຄອງອຸທິຍານແຫ່ງຊາດ ນາກາຍ-ນ້ຳເທີນ ສືບຕໍ່ຄົ້ນຄວ້າສ້າງກົນໄກປະສານງານ, ກົນໄກດ້ານການເງິນ ແລະ ວິທີການອື່ນໆ ເພື່ອສ້າງແຮງຈູງໃຈແກ່ປະຊາຊົນ ທີ່ອາໄສຢູ່ໃນ ແລະ ອ້ອມຂ້າງເຂດປ່າສະຫງວນ ໃຫ້ເຂົ້າມາມີສ່ວນຮ່ວມ; 4. ໃຫ້ກົມປ່າໄມ້, ກົມຈັດຕັ້ງ ແລະ ພະນັກງານ ແລະ ພາກສ່ວນກ່ຽວຂ້ອງ ປະສານສົມທົບ ຕິດຕາມ, ກວດກາ ແລະ ປັບປຸງຄືນ ໂຄງປະກອບສ້າງດ້ານບຸກຄະນະກອນ ຂອງກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ໃຫ້ມີປະສິດທິ ພາບ ຮັບປະກັນໄດ້ທັງຄຸນນະພາບ ແລະ ປະລິມານ; 5. ສະເໜີໃຫ້ ອົງການປົກຄອງຂັ້ນທ້ອງຖິ່ນ ສືບຕໍ່ ກວດກາ ຕິດຕາມ ແລະ ຊຸກຍູ້ ສະໜັບສະໜູນກອງຄຸ້ມຄອງອຸທິຍານແຫ່ງຊາດ ນາກາຍ-ນໍ້າເທີນ ໃນການຈັດຕັ້ງປະຕິບັດວຽກງານຄຸ້ມຄອງ ປົກປັກຮັກສາຊັບພະຍາກອນທໍາມະຊາດ, ຊີວະນາໆພັນ ແລະ ການພັດທະນາປັບປຸງຊີວິດການເປັນຢູ່ ຄຽງຄູ່ກັບການອະນຸລັກ ແລະ ວຽກງານຕ່າງໆທີ່ກ່ຽວຂ້ອງ ໃຫ້ເປັນລະບົບ ແລະ ເປັນປົກກະຕິ ເພື່ອສ້າງອຸທິຍານແຫ່ງຊາດດັ່ງກ່າວ ເປັນຕົວແບບໃນການຄຸ້ມຄອງ ປົກປັກຮັກສາປ່າໄມ້ ແລະ ຊີວະນາໆພັນ ຢ່າງມີປະສິດທິພາບ ຕາມທິດສີຂຽວ ແລະ ພັດທະນາແບບຍືນຍົງ.