ແຜນຍຸດທະສາດ III: ນຳໃຊ້ ປ່າໄມ້ ແລະ ທີ່ດິນປ່າໄມ້

ແຜນວຽກຈຸດສຸມ 3.1: ອຸດສາຫະກຳ ການທ່ອງທ່ຽວແບບອະນຸລັກທຳມະຊາດ

• ໂຄງການ 1: ສົ່ງເສີມທຸລະກິດການທ່ອງທ່ຽວແບບອະນຸລັກທຳມະຊາດ ໃນເຂດປ່າໄມ້

  ໂດຍສຸມໃສ່ ການສໍາຫຼວດ ແລະ ກຳນົດ ຊັບພະຍາກອນທ່ອງທ່ຽວຕາມທໍາມະຊາດ ທີ່ມີທ່າແຮງ ໃນເຂດປ່າໄມ້ ແລະ ທີ່ດິນປ່າໄມ້, ຊຸກຍູ້ ແລະ ສົ່ງເສີມ ປະຊາຊົນບັນດາເຜົ່າ, ຜູ້ປະກອບການ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ, ສ້າງ ແລະ ລົງທຶນ ເຂົ້າໃນການພັດທະນາ ແຫຼ່ງທ່ອງທ່ຽວແບບອະນຸລັກທໍາມະຊາດ.

• ໂຄງການ 2: ການພັດທະນາ ແລະ ສ້າງຄວາມເຂັ້ມແຂງ ດ້ານການບໍລິການ ການທ່ອງທ່ຽວ ໃຫ້ແກ່ປະຊາຊົນບັນດາເຜົ່າ

  ສຸມໃສ່ ເຂດທີ່ມີທ່າແຮງ, ເງື່ອນໄຂ ແລະ ຄວາມພ້ອມ ຂອງແຕ່ລະທ້ອງຖິ່ນ ໂດຍການ ສ້າງຕັ້ງກຸ່ມ, ສະມາຄົມ ແລະ ສະຫະກອນ.

ແຜນວຽກຈຸດສຸມ 3.2: ການຊື້ ຂາຍສິນເຊື່ອກາກບອນປ່າໄມ້

• ໂຄງການ 1: ສ້າງປະຖົມປັດໄຈ ໃຫ້ແກ່ ການພັດທະນາໂຄງການສິນເຊື່ອກາກບອນປ່າໄມ້

  ແນໃສ່ຈັດຕັ້ງປະຕິບັດແຜນງານແຫ່ງຊາດ ການປະກອບສ່ວນແກ້ໄຂບັນຫາ ການປ່ຽນແປງດິນຟ້າອາກາດ (NDC) ແລະ ຊື້ ຂາຍສິນເຊື່ອກາກບອນປ່າໄມ້ ໂດຍສຸມໃສ່ ກຳນົດນະໂຍບາຍ, ນິຕິກໍາ ແລະ ວິທີການ ກ່ຽວກັບການຕິດຕາມກວດກາ ການຫຼຸດຜ່ອນການປ່ອຍທາດອາຍເຮືອນແກ້ວຈາກການທຳລາຍປ່າໄມ້ ແລະ ການເຮັດໃຫ້ປ່າໄມ້ຊຸດໂຊມ.

• ໂຄງການ 2: ສົ່ງເສີມ ທຸລະກິດຊື້ ຂາຍສິນເຊື່ອກາກບອນປ່າໄມ້

  ໂດຍສຸມໃສ່ ສ້າງ ແລະ ຈັດຕັ້ງປະຕິບັດ ແຜນງານ ຫຼື ໂຄງການຊື້ ຂາຍສິນເຊື່ອກາກບອນປ່າໄມ້ ທີ່ລັດ ລົງທຶນ ແລະ ລົງທຶນຮ່ວມລະຫວ່າງ ລັດ, ປະຊາຊົນ ແລະ ຜູ້ປະກອບການ, ພ້ອມທັງ ຊຸກຍູ້ ແລະ ສົ່ງເສີມ ບຸກຄົນ, ນິຕິບຸກຄົນ ຫຼື ການຈັດຕັ້ງ ລົງທຶນໃນທຸລະກິດຊື້ ຂາຍສິນເຊື່ອກາກບອນປ່າໄມ້, ສ້າງຄວາມເຂັ້ມແຂງໃຫ້ແກ່ ບຸກຄົນ, ນິຕິບຸກຄົນ ຫຼື ການຈັດຕັ້ງ ໃຫ້ສາມາດເຂົ້າເຖິງຕະຫຼາດ ສິນເຊື່ອກາກບອນປ່າໄມ້ ທັງຮູບແບບ ບັງຄັບ ແລະ ສະໝັກໃຈ (Compliance and Voluntary Markets).

• ໂຄງການ 3: ສົ່ງເສີມການພັດທະນາພະລັງງານສະອາດ ທີ່ເປັນມິດຕໍ່ສິ່ງແວດລ້ອມ

  ໂດຍການສ້າງປະຖົມປັດໄຈ ແລະ ສິ່ງເອື້ອອຳນວຍ ໃຫ້ແກ່ພາກສ່ວນທີ່ກ່ຽວຂ້ອງ ເພື່ອຈັດຕັ້ງປະຕິບັດແຜນງານ ຫຼື ໂຄງການ ທີ່ລັດ ລົງທຶນ ແລະ ລົງທຶນຮ່ວມລະຫວ່າງ ລັດ, ປະຊາຊົນ ແລະ ຜູ້ປະກອບການ, ພ້ອມທັງ ຊຸກຍູ້ ແລະ ສົ່ງເສີມ ບຸກຄົນ, ນິຕິບຸກຄົນ ຫຼື ການຈັດຕັ້ງ ລົງທຶນເຂົ້າໃນວຽກງານພັດທະນາພະລັງງານສະອາດ ແລະ ເປັນມິດຕໍ່ສິ່ງແວດລ້ອມ.